Abiertu’l plazu d’inscripción nes actividaes XUNTES (alcuentros comerciales) y ROLDA (presentaciones curties), que se van desenvolver nel marcu del proyectu Música en Rede, Alcuentru profesional en Llaboral Ciudá de la Cultura del 8 al 10 d’abril del 2025

Recepción de propuestes hasta’l 7 de marzu del 2025. Inscripción al traviés d’esti enllaz.

Presentación de proyectos ROLDA

Nel marcu de la II edición de Música en Rede, Alcuentru profesional que se va facer en Llaboral Ciudá de la Cultura del 8 al 10 d’abril del 2025, van llevase a cabu presentaciones curties de proyectos ROLDA.

Estes sesiones tán diseñaes pa captar l’interés de públicu diverso, incluyendo asistentes al eventu, collaboradores potenciales, socios inversores, patrocinadores públicos y privaos, amás de medios de comunicación interesaos nel espardimientu d’iniciatives innovadores nel ámbitu musical.

Les presentaciones van facese’l miércoles 9 y el xueves 10 d’abril de 15:45 a 16:45 hores, na sala que s’habilite de la Llaboral Ciudá de la Cultura. Cada creador va tener la oportunidá d’esponer la so propuesta de manera atractiva y dinámica, cola mira de destacar el so valor artísticu, el so potencial de mercáu y la so capacidá de xenerar impactu cultural y económicu. Amás, los profesionales asistentes van poder facer consultes al final de les presentaciones sobre’l proyectu pa esclariar y/o tener información adicional sobre la propuesta, facilitando asina un espaciu d’interacción p’afondar nes oportunidaes de collaboración y desenvolvimientu.

Condiciones de participación:

Tolos proyectos que se presenten han tar inscritos nel Catálogu de l’Actividá Musical Profesional Asturiana.

Les propuestes van poder tar impulsaes por: grupos o solistes; empreses de distribución; promotores de festivales o otros eventos musicales o otres empreses rellacionaes cola música.

Va escoyese un mínimu de 20 presentaciones.

Van tener acoyida proyectos artísticos de toles manifestaciones musicales de formatos, estilos y públicu oxetivu variaos como rock, folk, indie, pop, instrumental, clásica, tradicional, coral, electrónica, esperimental, etc., presentaos por artistes profesionales o promotores o distribuidores de proyectos.

Namás va aceptase una propuesta por participante.

Cada participante va disponer de 5 minutos de presentación y va poder utilizar material audiovisual de sofitu. Nel casu de que-y escueyan la so propuesta, la persona participante va tener qu’unviar esti material a la organización con una antelación de lo menos 7 díes hábiles.

Los criterios de selección que se van tener en cuenta son estos:

• Interés especial pola so singularidá.
• Inclusión de temes de creación propia.
• Interés cultural y artísticu del proyectu.
• Trayectoria, esperiencia y formación.
• Viabilidá técnica y económica.
• Potencial de mercáu y proyección.
• Va ponese una atención especial a la presencia del asturianu y l’eonaviegu.
• L’orde d’inscripción en casu d’empate.

Con esa mira va valorase la información disponible na plataforma Asturies, Cultura en Rede y nel formulariu d’inscripción.

XUNTES Alcuentros comerciales

Trátase d’alcuentros comerciales curtios que s’entamen cola mira de promover la conversación y l’asesoramientu ente asociaciones y empreses (artistes y promotores o distribuidores) y programadores, xestores culturales, profesionales de la comunicación y managers, tratando de favorecer la cooperación, l’intercambéu de conocencies y el desenvolvimientu de sinerxes futures dientro del sector. Los alcuentros van facese’l miércoles 9 d’abril de 13:00 a 14:00 hores, na sala que s’habilite de la Llaboral.

En  confirmando l’interés y la disponibilidá pa participar nos alcuentros, la organización va contactar colos interesaos y interesaes pa zarrar les cites.

La participación va ser limitada y va tenese en cuenta l’orde d’inscripción.