L’eventu va abordar casos d’éxitu como Celtic Connections y el Festival Intercélticu de Lorient nes sesiones formatives

Del 8 al 10 d’abril, Llaboral Ciudá de la Cultura acueye un espaciu d’aprendizaxe colectivu sobre financiación, dixitalización y proyección internacional del sector musical

05/04/2025.- La Conseyería de Cultura, Política Llingüística y Deporte organiza la selmana próxima la muestra sectorial Alcuentru profesional, Música en Rede, que va axuntar a 190 profesionales de la industria musical estatal y internacional en Llaboral Ciudá de la Cultura nos díes 8, 9 y 10 d’abril.

La segunda edición d'esta muestra inclúi doce conciertos de curtia duración, siete meses redondes, trés sesiones formatives, dos presentaciones de proyectos y un alcuentru comercial nel que se van dar cita los axentes implicaos na industria musical asturiana, creando sinerxes ente profesionales del sector, xenerando espacios de debate y amosando'l talentu musical d'artistes asturianos.

Blues & Decker, María Daz, The Soulers, De Fem, Akin & The Afrobeat Brothers, Marco Martínez Trío, Vérsica, Llevólu’l Sumiciu, Herbamora, Maimuny, Alienda y Vero Rubio van ser los 12 artistes y grupos que van mostrar el so trabayu nel Teatru, Paraninfu y Antigües Cocines de La Llaboral en conciertos en formatu showcase, de duración curtia.

Les fórmules de comunicación n’entornos dixitales, les metodoloxíes nueves pa la enseñanza musical, el texíu asociativu de los mánagers musicales, l'autoxestión musical o los proyectos realizaos dende Asturies con proyección mundial son dalgunos de los temes que se van abordar nes meses redondes (Conxustes) nes trés xornaes na Llaboral.

Tamién va haber sesiones formatives (Erbíes) sobre los modelos d'ésitu de Celtic Connections y el Festival Intercélticu de Lorient, sobre financiación pal sector musical n'Asturies y pa empezar na autoxestión musical.

Amás, va haber un alcuentru comercial (Xuntes) y van presentase 18 proyectos (Rolda) mientres la muestra, en dos sesiones curties nes que programadores, distribuidores y otros profesionales van poder conocer los sos trabayos. Pue ampliase la información sobre'l programa en www.musicaenrede.asturiesculturaenrede.es