Abiertu’l plazu d’inscripción pa les actividaes XUNTES (alcuentros comerciales) y ROLDA (presentaciones curties), que van facese nel marcu del proyectu Música en Rede, Alcuentru profesional en Llaboral Ciudá de la Cultura del 16 al 18 d’abril del 2024

Recepción de propuestes hasta’l 25 de marzu del 2024. Inscripción nesti enllaz.

Presentación de proyectos ROLDA

Son presentaciones curties onde los interesaos/es van poder mostrar los sos proyectos a los programadores, distribuyidores y otros profesionales qu’asistan al alcuentru profesional.

¿Yes artista? Defendi’l to proyectu énte un programador; ¿Yes un organizador de festivales? Cúnta-y to proyectu a un collaborador/sponsor potencial; ¿Yes mánager? Muestra tol potencial de la to banda énte los medios de comunicación.

Les presentaciones van facese nel Paraninfu de la Llaboral el miércoles 17 y el xueves 18 d’abril de 15:45 a 16:45 hores.

La sala tien medios técnicos d’apoyu: megafonía, pantalla, etc. a disposición del interesáu/ada.

Condiciones de participación:

• Tolos proyectos que se presenten han tar inscritos nel Catálogu de l’Actividá Musical Profesional Asturiana.
• Les propuestes pueden impulsales grupos o solistes; empreses distribuyidores; promotores de festivales o otros eventos musicales o otres empreses rellacionaes cola música.
• Van escoyese un mínimu de 20 presentaciones.
• Van tener cabida proyectos artísticos de toles manifestaciones musicales de formatos, estilos y públicu oxetivu variaos, como rock, folk, indie, pop, instrumental, clásica, tradicional, coral, electrónica, esperimental, etc., presentaos por artistes profesionales o promotores o distribuyidores de proyectos.
• Namás va aceptase una propuesta por artista.
• Cada artista va disponer de 5 minutos de presentación y va poder usar material audiovisual d’apoyu.

Los criterios de selección son estos:

• Interés especial pola so singularidá.
• Inclusión de temes de creación propia.
• Interés cultural y artísticu del proyectu.
• Trayectoria, esperiencia y formación.
• Viabilidá técnica y económica.
• Potencial de mercáu y proyección.
• Va considerase d’interés especial la presencia del asturianu o eonaviegu.

Van tener prioridá profesionales que tean interesaos y que los sos proyectos nun resultaren escoyíos na convocatoria de selección de showcases.

La valoración va facela’l comité de valoración del Alcuentru profesional Música en Rede.

XUNTES Alcuentros comerciales

Trátase d’alcuentros comerciales curtios que se programen pa promover los intercambeos ente empreses (artistes y promotores o distribuyidores) y los programadores y xestores culturales, tratando de favorecer la cooperación y la internacionalización del sector.

Los alcuentros van facese’l miércoles 17 d’abril, de 13:00 a 14:00 hores, na Sala 2 de la Llaboral.

Desque se confirme l’asistencia de los programadores y xestores culturales, amás de la so disponibilidá pa participar nos alcuentros, la organización va contactar colos interesaos y interesaes pa concretar tolos detalles.

La participación va ser limitada y va tenese en cuenta l’orde d’inscripción.

Bases completes disponibles equí.