 |
Xosé Ambás - Artista
Xosé Ambás ye músicu, enfermeru y estudiosu de les tradiciones orales asturianes. Empieza a últimos de los 90 un llabor de recopilación que llevó a la creación d’ATOAM (Archivu de la Tradición Oral d’Ambás), de N’Arba y Tuenda, y anguaño forma parte, con Pepín de Muñalén y Vero Rubio, del proyectu Buir. De la mano de Ramsés Ilesies, realiza un llabor de divulgación na Televisión del Principáu d’Asturies con programes dedicaos a la etnomusicoloxía qu’empezó cola serie Camín de Cantares y siguió con Camín y Siguir en Camín. Ye enfermeru na sanidá pública asturiana, onde tamién realiza’l trabayu de recopilación y d’humanización al traviés de la música tradicional y de la escucha del propiu paciente. |
 |
Leticia Baselgas - Artista
Leticia Baselgas ye Llicenciada en BB. AA., PhD n’Historia del Arte na Universidá d’Uviéu, música y cocreadora del dúu L-R. Nos últimos años punxo en práctica la so principal tesis d’investigación al traviés del conceptu post-folk-asturianu. Trabaya y esperimenta cola resignificación de la praxis de la música tradicional asociada a la pandereta y a la muyer al tiempu que propón modelos alternativos pa la so apaición y desenvolvimientu nes esferes públiques. Publicó los discos post-folk-asturianu, N.O.S. y V.O.S. (xunto a Rubén Bada) y l’ensayu Diarios de una panderetera. Forma parte de los grupos L-R, Calea y Breihz Asturies Project. |
 |
Ferla Megía - Artista
Fernando Labrador Megía, más conocíu como Ferla Megía, ye músicu multinstrumentista y diseñador gráficu. Nel 2019 entraba na escena col so primer proyectu, Casetes, pa depués publicar el so primer EP baxo’l nome Ferla Megía nel 2021. Euforia, pasión, rabia, allegría y señaldá musicaes con ritmos que pueden dir dende la canción d’autor al trap, dende l’ambient al reguetón; melodíes que pueden sonar en cualquier valle asturianu, pero tamién nel club de moda de la capital europea de turnu. Páxaros 02 ye’l so últimu trabayu y recibió nel 2025 el Premiu Camaretá al Meyor Cantar col tema Xatu. |
