Muestra Llabor

Depués de 30 años enriba de los escenarios, el músicu Rubén Bada vien d’editar el so primer discu en solitario. Un trabayu qu’axunta la esperiencia acumulada acompañando a los más de los artistes de la escena de la música de raigañu n’Asturies y collaborando con grandes nomes de la escena musical del Arcu Atlánticu. El proyectu, qu’empezó como un dúu con Elías García, yá desapaecíu y figura fundamental de la música de reellaboración de la tradición n’Asturies, foi mutando y nesti momentu la formación cola que se presenta esti discu ye la de Rubén a la voz, guitarra, bouzouki y violín, y Pepín de Muñalén, consideráu como’l mayor esponente de la flauta de madera n’Asturies.

Nos conciertos de Rubén Bada podemos escuchar dende música pal baille tradicional hasta arreglos pa guitarra solista o violín que nos muestren la poética d’un artista que recueye un heriedu del pasáu col que s’impulsa pal futuru.