1. 1
2. 2
3. 3
4. 4

Alcuentru profesional, Música en Rede ye una muestra sectorial dedicada a la música nel marcu del proyectu Asturies, Cultura en Rede que quier dar respuesta a estos oxetivos:

• Ayudar a la profesionalización, capacitación y dinamización del texíu asociativo y empresarial de la industria musical del Principáu d’Asturies xenerando espacios pal aprendimientu, la interacción, el debate y la reflexón nun entornu dinámicu, ente tolos axentes involucraos nel ecosistema musical.
• Llevar alantre una acción de mediación cultural pa estimular la dinámica comercial ente artistes y promotores asturianos y programadores cola mira d’escoyer espectáculos pa programalos nos sos territorios y facilitar la comunicación, cooperación y intercambéu ente artistes y instituciones.
• Potenciar estilos nuevos de creación, llinguaxes nuevos y, sobre manera, proyectos novedosos qu’arriquezan el panorama musical.
• Llevar alantre una acción de mediación cultural, col alcuentru físicu de referencia pa estimular les dinámiques artístiques y comerciales ente los artistes asturianos y tolos componentes de la cadena de valor de la industria musical: programadores públicos y privaos, axencies de management y comunicación, productores, distribuidores, medios de comunicación, centros d’enseñanza, despachos llegales, estudios de grabación y otres feries profesionales especializaes.
• Potenciar la visibilidá de propuestes musicales nueves y llinguaxes artísticos nuevos dientro de los estilos musicales variaos que conviven na nuestra rexón, dotándolos de ferramientes que posibiliten la so medría y desenvolvimientu sostenible nel tiempu.
• Fomentar el desenvolvimientu rexonal, nacional y internacional de la marca Asturies, Cultura en Rede, que reflexe la calidá y diversidá artística existente nel Principáu d’Asturies y el so potencial como ferramienta de desenvolvimientu cultural propiu, fomentando un sector económicu con un valor añadíu altu y grandes posibilidaes de medría: el sector de les Industries Culturales y Creatives (ICC).

Al traviés del Alcuentru profesional, Música en Rede, quier establecer un puntu d’alcuentru profesional y comercial onde los axentes implicaos na industria musical del Principáu d’Asturies tengan la oportunidá de mostrar el talentu de los artistes asturianos, se creen sinerxes ente profesionales del sector, se xeneren espacios de debate y se propongan dinámiques nueves nel ecosistema musical qu’ayuden a la profesionalización.

El desenvolvimientu del alcuentru va ser en Llaboral Ciudá de la Cultura en Xixón ente’l 16 y el 18 d’abril del 2024 y va cuntar con un programa d’actividaes como XUNTES (alcuentros comerciales), CONXUSTES (meses redondes), ROLDA (presentación de proyectos), ERBÍES (talleres técnicos), EN REDE (puntu d’asesoramientu) y LLABOR (showcases), pa qu’artistes, profesionales y públicu tengan oportunidá d’interactuar y texer redes, amás de ser un escaparate pa visibilizar, dinamizar y profesionalizar la música emerxente fecha n’Asturies.

Alcuentru profesional Música en Rede ye un proyectu impulsáu dende la Conseyería de Cultura, Política Llingüística y Deporte del Principáu d’Asturies, al traviés de la Sociedá Pública de Xestión y Promoción Turística y Cultural del Principáu d’Asturies.