Van ufiertar conciertos de duración curtia abiertos al públicu los díes 16, 17 y 18 d’abril en Llaboral Ciudá de la Cultura

15/04/2024.- 12 artistes y grupos asturianos van mostrar el so talentu enriba l’escenariu en Música en Rede, Alcuentru Profesional, la muestra sectorial dedicada a la industria musical asturiana que va desenvolvese los díes 16, 17 y 18 d’abril en Llaboral Ciudá de la Cultura.

Elena del Frade, Galgo, L-R, César Latorre, Ferla Megía, Pablo Canalís, Fee Reega, Mapi Quintana, José Manuel Tejedor, Algaire, Héctor Braga y Mardom son los artistes que van actuar nel Paraninfu y nel Teatru na sección Llabor, con conciertos en formatu showcase, de duración curtia, y abiertos al públicu, con retirada previa d’invitación.

Música en Rede, Alcuentru Profesional quier establecer un puntu d’alcuentru profesional y comercial ente los axentes implicaos na industria musical, mostrando’l trabayu d’artistes del Principáu, creando sinerxes ente profesionales del sector y xenerando espacios de debates. Pa eso, amás de les  actuaciones, va haber cuatro sesiones formatives (Erbíes); cuatro meses redondes (Conxustes); un puntu d’asesoramientu (En rede) en dos tardes; y dos presentaciones curties de proyectos (Rolda) nes que 14 artistes, promotores y empreses van presentar los sos trabayos.

Música en Rede, Alcuentru Profesional realízase nel marcu d’Asturies, Cultura en Rede, un proyectu de la Conseyería de Cultura, Política Llingüística y Deporte xestionáu pola Sociedá Pública de Xestión y Promoción Turística y Cultural del Principáu d’Asturies.

La información y el programa completu pue consultase na web musicaenrede.asturiesculturaenrede.es. Les invitaciones pa les actuaciones de la sección Llabor tán disponibles na Recepción de la Llaboral, nel Centru d’Información Turística del Principáu d’Asturies (CITPA) n’Uviéu, nel Centru Niemeyer n’Avilés, nel teléfonu 952 076 262, n’unientradas.es y na web de la Muestra.